Սուրեն Մաթևոսյան. «Ararat Cup-ում բոլորը մեկ՝ կարատեի լեզվով են խոսում»Սուրեն Մաթևոսյան. «Ararat Cup-ում բոլորը մեկ՝ կարատեի լեզվով են խոսում»

Սուրեն Մաթևոսյան. «Ararat Cup-ում բոլորը մեկ՝ կարատեի լեզվով են խոսում»

07.05.18 19:41
Սուրեն Մաթևոսյան. «Ararat Cup-ում բոլորը մեկ՝ կարատեի լեզվով են խոսում»

Անցած հանգստյան օրերին Երևանում առաջին անգամ անցկացվեց վանդական կարատեի «Ararat Cup 2018» միջազգային առաջնությունը, որի ընթացքում իրենց ուժերը չափեցին Հայաստանի, Լեհաստանի, Ռուսաստանի, Իրանի, Իսրայելի, Ուզբեկստանի և Մոլդովայի մարզիկները: Մրցաշարին նախորդեց Ավանդական կարատեի Համաշխարհային ֆեդերացիայի (WTKF) նախագահ Վլադիմիր Կվիչինսկու գլխավորությամբ անցկացված սեմինար-պարապմունքը:

Ararat Cup-ի նախապտրաստական աշխատանքների, ճանապարհին հանդիպած բարդությունների ու մրցաշարից ստացած տպավորությունների և հետագա անելիքների մասին զրուցեցինք Հայաստանի Ավանդական կարատեի ֆեդերացիայի նախագահ (սև գոտի 5-րդ դան) Սուրեն Մաթևոսյանի հետ:

Պարոն Մաթևոսյան, ինչպես հղացավ մրցաշարի անցկացման գաղափարն ու ինչո՞ւ հենց Ararat Cup:

-Մրցաշարի նախապատմությունը հետևյալն է: Յուրաքանչյուր տարի մենք Հայաստան ենք հրավիրում աշխարհի ավանդական կարատեի ֆեդերացիայի նախագահ Վլադիմիր Կվիչինսկուն, որպեսզի նա այստեղ սեմինար-պարապմունք անցկացնի: Հենց նա էլ հերթական այցի ժամանակ հարցրեց, թե ինչու չենք ուզում միջազգային մրցաշար կազմակերպել: Ընդ որում՝ ըստ նախնական տարբերակի, այդ մրցաշարին մասնակցելու էին միայն Հայաստանի ու Լեհաստանի մարզիկները, բայց, ինչպես տեսնում եք՝ մեր անդրանիկ մրցաշարի աշխարհագրությունը բավական լայն է՝ մրցաշարին 7 երկիր է մասնակցում: Ինչ վերաբերում է «Ararat Cup» անվանը, ապա պետք է նշեմ, որ սա էլ սենսեյ Կվիչինսկու առաջարկն էր, որը մենք հաճույքով ընդունեցինք: Հույս ունեմ, որ մրցաշարի անցկացումն ավանդույթ կդառնա, ու արդեն հաջորդ տարիներին կմեծանա նաև մասնակից թիմերի թիվը:

Մրցաշարի առաջին օրը մրցեցին մինչև 14 տարեկանները, իսկ արդեն 2-րդ օրը՝ 14-ից բարձր՝ սև գոտիներն իրենց համապատասխան տարիքային խմբերում: Մրցումներն անցկացվեցին ավանդական կարատեի 7 մրցաձևերում՝ անհատական կատա, թիմային կատա, անհատական կումիտե, թիմային կումիտե, էն-բու, ֆուկուգո,կոգո:

-Ովքե՞ր են սպասարկում մրցաշարը, ովքե՞ր են մրցավարները:

-Մրցաշարը հիմնականում սպասարկում է մեր՝ Հայաստանի (այդ թվում նաև Արցախի) մրցավարական թիմը, ինչպ ես նաև 2 մրցավար Լեհաստանից, 2-ը՝ Ռուսաստանից, 1-ը Ուզբեկստանից, 1-ը՝ Մոլդովայից ու 1-ը Իսրայելից: Ի ուրախություն բոլորիս՝ բողոքներ չեն եղել մրցավարությունից, ամեն բան շատ մաքուր է անցել, ինչը հրաշալի է առաջին անգամ անցկացվող մրցաշարի համար:

-Պարոն Մաթևոսյան, մրցաշարին նախորդող մի քանի շաբաթը չափազանց լարված էր մեր Հանրապետության համար: Գո՞հ եք՝ նախապատրաստական աշխատանքների ընթացքից, արդյո՞ք ամեն բան այդ խառնաշփոթով պայմանավորված կարողացաք հասնել:

-Վստահաբար կարող եմ ասել, որ իրադարձությունների նման զարգացումը Աստծո կամքն էր: Մայիսի 2-ին մենք ամեն գործ դադարեցրեցինք (մայիսի 2-ին մայրաքաղաքի բոլոր փողոցները փակ էին, աշխատանքը՝ կաթվածահար եղած, համաքաղաքային բողոքի ակցիա էր ընդդեմ ԱԺ որոշման - ԽՄԲ)՝ որոշում կայացնելով լինել մեր ժողովրդի կողքին: Դա շատ բարդ որոշում էր, քանի որ արդեն այդ օրը պիտի մեկնարկեր սեմինարը: Սակայն երեկոյան տեղի ունեցավ հրաշք, ու որոշվեց՝ առավոտի փոխարեն պարզապես երեկոյան անցկացնել սեմինարը:

Իրականում մրցաշարի անցկացման գաղափարը թեև շուտ էր հղացել, սակայն բուն նախապատրաստական աշխատանքներն անցկացվել են վերջին ամիսներին: Այդ առիթով առանձնահատուկ շնորհակալություն եմ ուզում ասել բոլոր մարզիչներիս ու մարզիկներիս՝ միավորվելու, գործելու ու այս ամենը պատվով կատարելու համար:

-Այս մրցաշարի արդյունքները, չարչարանքն ու փորձն ունենալով՝ արդեն ինչ-որ ակնկալիքներ կան հաջորդ տարվա վերաբերյալ:

-Իհարկե: Բնականաբար կային որոշակի բացթողումներ, որոնք մենք հաջորդ տարի անպայման կվերացնենք, կաշխատենք այդ ուղղությամբ: Ինչպես վերևում նշեցի՝ հույս ունենք լայնացնել մեր մասնակից երկրների աշխարհագրությունը: Եվ ամենակարևորը՝ մենք այս մրցաշարի միջոցով ուզում էինք հմտանալ՝ միջազգային մրցաշարեր անցկացնելու ու ընդունելու հարցում, քանի որ այժմ քննարկվում է Եվրոպայի առաջիկա առաջնություններից մեկը (չի բացառվում, որ հենց 2019թ-ինը) Երևանում անցկացնելու տարբերակը:

Ես վստահ եմ, որ ամեն ինչ լավ կլինի, քանի որ տեսնում եմ այն ընկերական մթնոլորտը, որ տիրում է այստեղ՝ տարբեր ազգերի ներկայացուցիչների միջև: Այստեղ բոլոր մեկ լեզվով՝ կարատեի լեզվով են խոսում:



sport.slaq.am - Սպորտային Լրատվություն




 



 
Ամենաընթերցված