Բռնցքամարտի Հայաստանի հավաքականը մեկնել է Ուկրաինա

Բռնցքամարտի Հայաստանի հավաքականը երեկ մեկնել է Ուկրաինա, որտեղ Կիևում համատեղ ուսումնամարզական հավաք կանցկացնի Իսրայելի, Իռլանդիայի, Բելառուսի և Ուկրաինայի հավաքականների հետ:

Հունիսի 1-13-ը տեղի ունեցող հավաքին Կարեն Աղամալյանի գլխավորությամբ կմասնակցեն 6 մարզիկներ. Ռիոյի Օլիմպիական խաղերի ուղեգիր նվաճած 49 կգ քաշային Արթուր Հովհաննիսյանը, 52 կգ քաշային Նարեկ Աբգարյանը, 56 կգ քաշային Արամ Ավագյանը, 69 կգ քաշային Վլադիմիր Մարգարյանը, ինչպես նաև 64 կգ քաշային Հովհաննես Բաչկովն ու 91 կգ քաշային Նարեկ Մանասյանը: