Մեկնարկել է կույր շախմատիստների տղամարդկանց անհատական ՀՀ առաջնությունը

Այսօր՝ հուլիսի 14-ին, ՀՀ սպորտի և երիտասարդության հարցերի նախարարության աջակցությամբ Հայաստանի կույրերի միավորման Սոկրատ Շահնազարյանի անվան մշակույթի տանը մեկնարկել է կույր շախմատիստների տղամարդկանց անհատական ՀՀ առաջնությունը:

Ինչպես տեղեկացնում է Սպորտի և երիտասարդության նախարարության պաշտոնական կայքը՝ առաջնության մասնակիցներին ողջունել և հաջողություն են մաղթել նախարարության մասսայական սպորտի և ֆիզիկական դաստիարակության վարչության պետ Եղիշ Դավթյանն ու «Հայաստանի կույրերի միավորում» ՀԿ-ի փոխնախագահ Մարտին Սարգսյանը:

4 ժամ տևողությամբ ու շրջանային կարգով ընթացող առաջնությանը մասնակցում են 16 շախմատիստ՝ Երևանից, Էջմիածնից, Արտաշատից, Սևանից, Վանաձորից, Գյումրիից:

Արդյունքները կամփոփվեն հուլիսի 28-ին, որի ժամանակ հաղթողներն ու մրցանակակիրները կպարգևատրվեն դիպլոմներով և խրախուսական հուշանվերներով: